الخميس، 15 مايو 2008

تاج السلطان برقش


جاءني هذا التاج من اخي الدكتور برقش ورغم عدم حبي للتيجان ( تواضع ) الا انه جاء في الوقت المناسب قبل أن انبش في الماضي وأخرج عليكم بذكريات 2 و 3 و ...... على غرار ويبقى الامل 1 , 2, 3 , ..... المهم انني منذ علمت بأمر هذا التاج وانا افكر ما الذي سأكتبه فيه فجميع من مر عليهم التاج كتبوة بطريقة جميلة و ظريفة ولم يعد هناك ما يمكن اضافته كما انني لم اجد شيئا لاكتبة عن نفسي ( تواضع 2) كما خشيت من ردود الاصدقاء على ما قد اكتبة وفي النهاية لم اجد بدا من ان اكتب وربنا يستر.... التاج يقول اكتب عشرة اشياء عن نفسك؟!!


1. متفاءلة جدا جدا جدا ( اسم على مسمى بصحيح ) ....

2. زمان كنت صبورة جدا ومرة وانا في ابتدائي حد صحى في نص الليل لقاني حاطة وشي على البلاط من كتر وجع اسناني عشان اخفف الالم من غير ما اعرف حد!! بس دلوقتي مش عارفة انا صبورة والا لأ ؟.. اصحابي اللي عارفني همه اللي يحكموا ....

3. بحب المكرونة بالبشاميل ومحشي ورق العنب والمسقعة - شكلي جعانة والا ايه -
4. وانا طالبة كنت بحب الرياضيات جدا , دلوقتي بحب برنامج الفوتوشوب وممكن لو حاجة مضايقاني اقعد اطلع همي فيه وعندي صبر عليه يعني ممكن اقعد اليوم كله في تصميم صورة واحده ..

5. بحب افلام الكرتون وبحس انها بتنقلني لعالم تاني .

6. بحب القراءة جدا واكتر واحدة لقيتها كاتبة اسماء الناس اللي انا بحب اقرأ لهم هي ام احمد المصرية , بس دلوقتي معتدش بقرأ زي الاول عشان ظروف الشغل .

7. بحب اخواتي بجنون ونفسي اعمل اي حاجة تسعدهم .

8. بكره الناس الصعبة واللي فيها شدة .

9. اول ما بنزل بوست بخاف قوي من التعليقات اللي هتجيلي بس شوية شوية لما بشوف التعليقات بيروح الخوف..

10.نفسي ادخل الجنة قوي وكتير كنت بقعد بليل على الارض جمب باب البلكونة واغمض عينية وابدأ احلم انى لابسة فستان جميييييييييل وواقفة على باب الجنة وبشم ريحتها وبسمع اصوات اهلها ومستنية ان ربنا يأذن لي بدخولها , وبعدين افوق واقول ياخبر انا فين والجنة فين وبعدين ترجع امل المتفاءلة تقولي ربنا رحمته واسعة ادعيه وان شاء الله يستجيب , يارب ارزقنيها برحمتك يا ارحم الراحمين .



واخيرا :

اذكر خمس اشخاص تهديهم التاج ؟!

انا هقول فزورة واللي يعرف اجابتها يفوز بالتاج : ما هو الشيء الذي إذا وضعناه في الثلاجة لا يبرد ؟

هناك 57 تعليقًا:

حـــــدوتـــــة يقول...

السلام عليكم
ايه ده انا اول تعليق
والله الواحد حظه حلو اليومين دول

الصراحة اجاباتك جميلة جدا
وخصوصا موضوع المكرونة بالبشاميل وورق العنب
لنى مدمن الاكلتين
على فكرة انتى جوعتينى

سلالالالالالالالالالالالالالالام

Unknown يقول...

السلام عليكم احلي امب في العالم

تخافي ايه بقي ومن مين داحنا اللي لما بنعلق بنخاف منعجبش (تواضع 3 )

والله اجاباتك مرحه بس مكاره يعني اخينا بعيد عن تصرفاتك وقلبك وكده .... ماشي

وع العموم ربنا يخليلك اخواتك وتدخلي الجنه والمفروض من شروط التاج انك تيجي تقوليلي لكن انا طلعت اجدع منك وجيت انا اهوه

سلام يا قمر

امل يقول...

حدوتة
وعليكم السلام ورحمة الله
مش عارفة اول ما قريت اذكر عشرة اشياء عن نفسك دي اول حاجة خطرت على بالي..نورتني بزيارتك وبتعليقك
وتقبل تحياتي

امل يقول...

bar2ash
وعليكم السلام ورحمة الله
ما هي من ضمن الحاجات اللي انا ماذكرتهاش عن نفسي اني خوافة كبيرة قوي
يعني بخاف اقول حاجة وبعدين اندم اني قلتها(تواضع4 لو تنفع )هههههه
وبالمناسبة انا رحت اعلنت عن التاج عندك بس عشان اكون امينة بعد ما قريت تعليقك اصلي حقيقي مشفتش الشرط
وتقبل تحياتي..

أحمد بكر يقول...

السلام عليكم
لهوه ايه صحيح اللى يتحط فى التلاجه ميبردش
قولى و النبى لحسن احترت
تحياتى

rovy يقول...

السلام عليكم
اجابات جميله لشخصيه جميله
متفانيه و صبوره ومحبه للخير والناس
يا رب يخليلك اخواتك و تشوفيهم فى احسن حال ويخليلك كل احبابك .
نفسى اعزمك على المكرونه بالبشاميل وورق العنب والمسقعه اصلهم من الاكلات اللى بحبها وكمان شاطره فى عمايلهم .
حقيقى انت شخصيه جميله وحنونه وربنا يكرمك .
دمت بخير وسعاده وامل
ووفقك الله ورعاك
تحياتى
rovy

امل يقول...

baker
وعليكم السلام ورحمة الله
نورتني بزيارتك بس الحقيقة انا مش عارفة اجابة الفزورة عشان كده
قلت اخليكو تفكروا معايا

امل يقول...

rovy
وعليكم السلام ورحمة الله وبركاته
انتي الاجمل والارق ياروفي
وتعليقاتك دايما بتسعدني
ومين عارف يمكن نتقابل في يوم من الايام
اذا ما كانش في الدنيا فيارب في الجنة
ووقتها تعزمينا كلنا عندك ان شاء الله
سلامي لبنوتاتك الجميلات

just me يقول...

على فكره انا علقت على البوست ده

ممكن اعرف فين تعليقى؟؟؟؟؟؟؟؟؟

ولا انا علقت فى مكان تانى ولا ايه؟؟؟؟؟

على العموم بجد كلامك عن نفسك هنا يدل انك انسانه كويسه وربنا يوفقك ان شاء الله

mregypt7 يقول...

ديه اول زياره منى ليكى
بس جد بوستك جامد اوى وجميل جدا
جميل اوى فكرك ده وجميله اوى روح التسامح ديه
وجميل ان الواحد فينا يكون دايما متفائل
والله كل الخصائص ديه مش هاتلاقيها الا فى المهندسين وبس لان فعلا انا برضه كده
استمرى فى الكتابه وما تخافيش من التعليقات
بوستاتك حلوه وزى الفل
والله انتى فله شمعه منوره
موز موز موز
اتمنى تشريفك لمدونتى
مع خالص تحياتى
الباش مهندس بوحميد

تايه في وسط البلد يقول...

احاسيسك..
هل فزت بالتاج؟

ياسر يقول...

السلام عليكم ورحمة الله وبركاته
انا والله جالي نفس التاج ومحتار صراحة
بس كل معملة امسحة لان روفي مررتهولي
بس بصراحة اجابتك اجابات طفلة بريئة وتقريبا
العشرة اسئلة متميزين
في الويك اند دة احاول اعملة انشاء الله
فائق احترامي وتحياتي
ياسر منصور bravo

كلام على بلاطة يقول...

ممكن تقول لنا ازاى نحصل علية
تحياتى

Darsh يقول...

اللي بيتحط في التلاجة وما بيبردش أكيد الفلفل أو الشطة مش كده ؟؟؟

أرجوكي قوليلي اني عبقري (تواضع) و إن الإجابة صح (ثقة) ...

هههههه

أمل بجد شخصية مميزة

و أحسن صفة ممكن تميز أي إنسان هي التفائل... ربما يديمه عليكي يا رب

ممممممممممم

بتحبي أفلام الكارتون :)

سبيس تون بقى و مارد وشوشني و شلبي سلوفان و سيمبا و البطريق السعيد

أروع أفلام و الله و خاصة انها بتأثر في الواحد اكتر من الأفلام الواقعية ...

ربنا يكتبلك الجنة بإذن الله انت و انا و كل المسلمين بإذن الله بغير عذاب

تــــ(حـنة)ــــر يقول...

أموله
ايه يا بنتى الجمال دة .. و الله الأجابات دى زي العسل يعنى عرفتى تعملى اللى معرفتش أعمله .
روحى المدونة شوفى انا عملت أنقلاب وربنا يستر

Nostor Azzuro يقول...

المسئعة
لو الجواب صح لازم جايزة

Nostor Azzuro يقول...

المسئعة
لو الجواب صح لازم جايزة

عاشــــــ النقاب ـقــــة"نونو" يقول...

دمك شربات يا امل ربنا يحفظك يارب
شخصية جميلة
الحل ايه بتاع الفزورة بقى
تحياتي

الدرعمي يقول...

السلام عليكم

أمل الجميلة

مبارك ٌ عليك ِ التاج ُ

ويارب تدخلي الجنة وتلبسي الفستان الجميل وتتمتعي برائحة الجنة

مستنيكي

هتلاقيني في عدن إن شاء الله


تحياتي لبساطتك ولورق العنب حبيبي


آدم

tarek alghnam يقول...

امل
اولا مدونتك رائعة
ثانى شئ انتى ذكرتى اكلات مفضلة عندى
وبعدين غلب حمارى فى فزورتك حرجع تانى اعرف الحل
وياريت تشرفينى بمدونتى تقرى اول حب فى الاسلام
ودمتى بحفظ الله

مجداوية يقول...

السلام عليكم

يا ست الكل توارد الخواطر وارد والقلوب عند بعضها انا مخترعتهاش يعنى
المهم احل الفزورة مش عشان اخد التاج التاج ده بالذات مش عايزاه بس من باب الترويح عن النفس

الثلج

مش برده هو متلج يبقى حيبرد ازاى اذا كان متلج اصلا وينفع معاه الايس كريم

اما اذا كنت بتقصدى يفضل سخن ولا يبرد يبقااااااااااااا

الشطة او الفلفل الحامى ودى انا دورت عليها ومش من عندى لو صح يبقى اللى مؤلفها ياخد التاج

تحياتى ودعواتى لك بكل الخير اختى الحبيبة

بنات صاحبة الجلالة يقول...

امل

اجابتك جميلة خالص وانا كمان بحب المكرونة الباشمل احنا بقي معزومين عندك ياقمر اعملي حسابنا وجميل اوي حبك لاخواتك ومحاولتك في اسعادهم ربنا يخليلهملك يارب وباذن الله تدخلي الجنة بعملك الصالح يارب

اجابة الفرورة الحاجة اللي لو حطنيها في الثلاجة لا تبرد هو الفلفل الحار

عايزن الجايزة طبق مكرونةههههههههههه

تحياتنا ياقمر

حبيبـــــــة القمـــــر يقول...

السلام عليكم
ازيك ياقمر اجاباتك ماشاء الله
وانتي عارفه اني معجبه بالتفاؤل والاصرار الموجود عندك ربنا يوفقك دايما

بس مكنتش اعرف انك بتحبي الكارتون
ابقى تعالي اقعدي معايا عندي كارتون كتير الواحد بينسى نفسه قصاده

خالص ودى يا حبوبه

امل يقول...

لست ادري
اهلا بيكي وبتعليقاتك كلها
سواء هنا او في مكان تاني
منوراني

funckydoctor يقول...

روحك حلوة
بصى اللى يتحط فى التلاجة مايبردش الوزراء أثلهم متلجين
بجد الإجابة الثلج طبعا ده يسيح فى التلاجة
وتحياتى لك

امل يقول...

mregypt7
والله كل الخصائص ديه مش هاتلاقيها الا فى المهندسين
ده(تواضع4)يا بشمهندس بوحميد
منورني بتعليقك الجميل
وان شاء الله تلاقيني عندك

امل يقول...

تايه في وسط البلد
جميلة قوي الاجابة دي
بجد نورتني

امل يقول...

ياسر
وعليكم السلام ورحمة الله وبركاته
ربنا يكرمك على التعليق الجميل ده
انا فعلا بحب احس ان انا طفلة
وان شاء الله منتظرة التاج بتاعك

امل يقول...

كلام على بلاطة
خلاص اعتبر التاج تاجك
وهستناك ترد عليه ان شاء الله
تحياتي لك

امل يقول...

darsh
انت عبقري والاجابة شكلها كده صح
(مدح)..وتعليقك دمه خفيف جدا
وربنا يتقبل منك الدعاء

mostafa rayan يقول...

اه صحيح يا امل ماهو الشيئ الذي اذا وضعناه في التلاجة لا يبرد ؟
تحياتي لكي

mostafa rayan يقول...

ربنا يرزقك والمسلمين الجنة يرزقنا اعلي درجتها ويكون لنا قصورا فيها بجوار قصرالنبي محمد صلي الله عليه وسلم وان يضحك لنا ربنا في الجنة وان نأخذ كتابنا بيميننا وان نورد حوض النبي محمد صلي الله عليه وسلم وان نشرب من يده شربة هنيئة مريئة لا نظمأ بعدها ابدا

امل يقول...

تمر حنة
انتي الاجمل يا تمرتي
وانتي فعلا عملتي انقلاب في عالم التيجان
بس انقلاب جميل
ربنا يوفقك ويسعد قلبك

امل يقول...

nostor azzuro
بس المسقعة ممكن تبرد برضه
مش كده والا ايه

امل يقول...

nonoymm
ايه النور ده
انا سعيدة جدا بان الاجابات عجبتك
والحل انا حقيقي مكنتش عارفاه
بس شكلة ينفع الفلفل الحار والا الشطة

امل يقول...

adm
وعليكم السلام ورحمة الله وبركاته
يارب ربنا يرزقنا جميعا الفردوس الاعلى من الجنة
وهحاول اوصل تحياتك لورق العنب
بس لما اقابله الاول ههههههههه
تحياتي لك

امل يقول...

ا.طارق الغنام
انا قرأت البوست بتاعك
جميل جدا واختيار اكتر من رائع
ربنا يكرمك يارب ويجزيك خير عليه

Unknown يقول...

امولة
بوستك يجنن

واسلوبك سلسل وراقى

بس عرفت عنك حاجات اكثر
كل الود

امل يقول...

اختي الفاضلة مجداوية
وعليكم السلام ورحمة الله وبركاته
منورة المدونة بتعليقك الجميل
انا اول حاجة مرت في بالي هيه التلج
بس الشطة والفلفل الحار ينفعوا برضه
بس انا مش عارفه الاجابة ايه

امل يقول...

بنات صاحبة الجلالة
خلاااااص انا شكلي كده اتورطت
ولازم اعزم الجميع على المكرونة والمحشي والمسقعة ههههههههه
سعيدة جدا بتعليقاتكم وروحكم المرحة الجميلة

امل يقول...

حبيبة القمر
وعليكم السلام ورحمة الله وبركاته
خلاص يا حبيبة انا هحاول اجيب طبق الكاستر واجي اتفرج على الكرتون عندك

امل يقول...

funckydoctor
ههههههههههه
اجابة جميله فعلا
معاك حق والله
سعيدة جدا بزيارتك
تحياتي لك

امل يقول...

mostafarayan
اللهم آمين دعاء جميل جدا
جزاك الله الف خير عليه

امل يقول...

نهر الحب
ربنا يكرمك على كلامك الجميل ده
وتقبلي تحياتي وودي

موناليزا يقول...

اجابة فزورتك مش عارفاها بس متهيألى انها "التلج"ولو كان غلط يبقى عروستى
بجد انتى عسولة وان شاء الله ندخل الجنة سوا برحمة ربنا طبعا
..................
لكى منى خالص الشكر على تعليقك عندى

-_- يقول...

والله يا امل انا لو اعرف اقول على طول

الربان يقول...

تحياتي

ما شاء الله عقلية جميلة و منظمة...واجابات رشيقة خفيفة.

أن شاء الله ربنا يكتبك من اهل الجنة و يرزقك الفردوس الاعلي....آمين.

حل الفزورة " الثلج"

تحياتي و تقديري

ولد مصري يقول...

ردود رائعة وبتدل على شخصية بسيطة

وأجمل حاجة إن الانسان فعلا يكون بسيط وعلى طبيعته لان الحياة مش ناقصة تعقيد

تمنياتي لكي بالتوفيق

تحياتي

.:.-=- ELGaZaLy-=-.:. يقول...

السلام عليكم اجباتك حلوة اوى,,,

انا كمان بحب المكرونة بالباشميل

همس الاحباب يقول...

التفاؤل شى جميل
والصبر مفتاح الفرج
وحب الاخوة شىء بيجرى فى دمنا
وحبنا لدخول الجنة امنية عزيزة وغالية على نفوسنا جميعا
واندخل برحمته سبحانه وتعالى ان شاء الله لانه لو على اعمالنا يبقى مش انشم رائحتها بصراحة
اجبات جميلة وشخصية رقيقة
الفزورة التلج طبعا
بس انا جاوبت على التاج قبلك
تحياتى
خالد

امل يقول...

monaliza
يارب ندخل الجنة كلنا
ونقعد نفتكر الايام دي ونضحك من قلبنا عليها اما الفزورة فشكلها تنفع التلج وتنفع الفلفل الحار او الشطة مش عارفه والله

امل يقول...

sharm
انا جيت ادخل المدونه عندك بس مش بتفتح معايا ان شاء الله ازورك قريب
تحياتي لك

امل يقول...

الربان
جزاك الله خيرا على دعائك الجميل وجعل لك مثله وافضل
والاجابة شكلها صح
تحياتي لك

امل يقول...

walad_masry
منورني بتعليقك الرقيق
وربنا يرزقنا واياك من فضله

امل يقول...

elgazaly
وعليكم السلام ورحمة الله وبركاته
ناس كتير هنا طلعوا بيحبوا الاكل ده
شكلي هتورط في عزومه

امل يقول...

همس الاحباب
ربنا يرزقنا واياك الجنة
ويعاملنا برحمته لا بأعمالنا
اسعدني تعليقك
جزاك الله خيرا

عايش... ولكن !!!! يقول...

اجاباتك جميله جدا
ومبروك عليكى التاج
تحياتى
علاء